“‘n Beskawing, volk of ‘n kultuur kan net voortbestaan as die verbond tussen geslagte doelgerig in stand gehou word. Elke geslag moet dit wat van die vorige geslagte ontvang is bewaar en dan in ‘n beter toestand aan die volgende geslag oordra. Hierdie oordrag geskied deur die kultuur se instellings soos skole, universiteite, stede en owerhede.

Dit is ons plig en voorreg om vir ons gesinne te sorg, maar dit is terselfdertyd ons verantwoordelikheid om midde in die verval in die land deur sterk selfhelp-instellings vir die volgende geslag Afrikaners ‘n beter toekoms na te laat as wat hulle nou het. Dit is hoekom ‘n vennootskap tussen kultuur en kapitaal, oftewel tussen sakelui en hulle gemeenskappe so belangrik vir die toekoms is.”

Só skryf Flip Buys in ‘n meningstuk op Maroela Media in April 2024.

By Kanton vra ons gereeld: In wie se hande sal jy jou geliefdes se toekoms toevertrou? Wie is verantwoordelik vir jou nalatenskap? Waar sien jy die toekoms van jou kinders, kleinkinders en selfs agterkleinkinders? Is jy ʼn toeskouer wat onbetrokke vanaf die kantlyn toekyk, óf is jy ʼn toekomsbouer wat jou moue oprol, saam droom én aktief bou aan iets blywends en opbouends?

Kanton se Toekomsbouer-veldtog bied aan jou die geleentheid om doelgerig die toekoms van Afrikaanse hoër onderwys te help verseker en só die verbond tussen die nageslagte in stand te hou. Dié veldtog, wat in Augustus 2024 bekendgestel is, verteenwoordig ʼn historiese keerpunt in die strewe na volhoubare vooruitgang vir en vanuit die Afrikaanse taal- en kultuurgemeenskappe. Vanuit die Toekomsbouer veldtog gaan ‘n splinternuwe kampus vir Akademia binnekort in die ooste van Pretoria verrys.

'n Belegging in die volhoubaarheid van Afrikaanse hoër onderwys is 'n stuiwer in die armbeurs van ons gemeenskap: die voortlewendheid van ons taal en ons toekoms.

Kanton span saam met Akademia om 'n nuwe, wêreldklas kampus te bou wat voorsiening maak vir 5 000 voltydse voorgraadse studente en nagenoeg 1 500 nagraadse studente. Vier mans- en vier dameskoshuise sal 1 500 studente op die kampus kan huisves. In totaal sal die ontwikkelingskoste meer as R3 miljard beloop.

Kanton ontwikkel leefruimtes vir die Afrikaanse gemeenskap, terwyl dit beide ’n kulturele en finansiële opbrengs vir sy beleggers bied. Kanton is die dryfkrag agter innoverende vennootskappe, wat fokus op die verskaffing van volhoubare eiendomsoplossings vir ‘n voorspoedige Afrikaanse gemeenskap.

“Deur eiendomme vir Afrikaanse instellings te ontwikkel word eietydse leefruimtes gevestig waar toekomstige generasies kan groei en floreer,” sê Henk Schalekamp, besturende direkteur van Kanton.

Hierdie kampusontwikkelingsprojek sal deur ʼn hibriede befondsingstrategie verwerklik word. Een van die maniere waarop die gemeenskap ʼn blywende nalatenskap kan bewerkstellig, is om tot die Akademia-skenkingsfonds by te dra.

Individue kan as volg tot die Akademia-skenkingsfonds bydra:

Eenmalige skenkings
Eenmalige skenkings sal Akademia help met onmiddellike en dringende behoeftes, soos byvoorbeeld die bou van nuwe infrastruktuur vir die kampus.

Maandelikse bydraes
By wyse van ʼn maandelikse bydrae kan individue oor tyd ʼn gereelde skenking maak wat die instelling sal help om ʼn stabiele inkomste te handhaaf en só projekte volhoubaar aan te pak. Hierdie opsie stel skenkers in staat om hul bydraes gemaklik oor ʼn tydperk te versprei.

ʼn Legaat of ʼn testamentêre erflating
Nóg ʼn skenkingsopsie is om ʼn legaat of erflating in jou testament te maak. Dit verseker dat jou nalatenskap voortleef in die uitbouing van Afrikaanse hoër onderwys vir toekomstige geslagte, sonder dat jou huidige finansiële posisie beïnvloed word.

Spesifieke skenkings
Die Akademia-skenkingsfonds bied jou voorts die geleentheid om jou skenking aan ʼn spesifieke deel van die kampusontwikkeling te koppel, soos byvoorbeeld die aanlê van infrastruktuur, of die oprigting van ʼn spesifieke gebou of fasiliteit. Hierdie keuse gee aan jou die gemoedsrus dat jou bydrae presies volgens jou wens aangewend sal word.

Ongespesifiseerde skenkings
Ongespesifiseerde skenkings gee aan die instelling die vryheid om jou skenking aan te wend waar dit die nodigste is, en sal voorts help om algemene ontwikkelingskoste te delg.

Hoe jy ook al besluit om tot dié fonds by te dra, jy sal kwalifiseer vir belastingaftrekkings by wyse van ʼn artikel 18A-belastingsertifikaat.

Vir meer inligting besoek die Akademia-webblad of stuur gerus ʼn e-pos na skenking@akademia.ac.za.